Albedo

Albedo u coeficient de reflexión ye la relación entre la enerchía solar que reflecta una superficie y la enerchía solar que bi incide. Ye un concepto comparable a la reflectividat, pero d'una aplicación mes especifica, que fan servir d'una traza notable en astronomía y planetolochía, asinas como tamién en cheolochía, climatolochía y ciencias d'a tierra en cheneral.

O termin albedo deriva etimolochicament d'o latín albēdo, que significa "blancura" y ha estau introduciu en o sieglo XVIII en optica y en astronomía por o matematico y astronomo suizo Johann Heinrich Lambert. Por definición, l'albedo ye una valor compresa entre 0 y 1: un cuerpo negro perfecto, que absorbería todas as ondas electromagneticas sin reflectar-ne denguna tendría un albedo nulo, mientres que un espiello perfecto, que reflectaría todas as ondas electromagneticas sin absorber-ne denguna, tendría un albedo igual a 1.

En os encomienzos d'as glaciacions l'albedo influye acelerando lo proceso en forma de realimentación positiva: as superficies cubiertas de chelo u nieu son muit claras por a color blanca y muit reflectoras, por o que absorben menos enerchía solar y en deixan escapar mes que atras superficies, fendo que baixen as temperaturas, o que fará que augmente la superficie cubierta por chelo u por nieu cuan torne a nevar.