Guerra

Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla.

A guerra (d'o chermanico < werra "discordia")^[1] ye o enfrentamiento entre países, u atras organizacions armatas, con l'uso de violencia y d'armas. Encara que dende sempre bi ha habito enfrentamientos entre os humans (tamién en as tribus prehistoricas), a guerra oficialment considerata como tal, con a participación d'exercitos, prencipia como si mesma en os primers imperios orientals, que ya emplegaban caballería y armamento elaborato.

A guerra ha estau muitas vegatas a causa d'a muerte de mils de sers humans, de muitas malautías, d'a pestilencia, a fambre, y d'atros mals.

Cuan a guerra se fa en contra d'as leis internacionals, se puet charrar de crimen de guerra; de totas trazas a guerra ye siempre una actividat cruel y despiadata.

A vegatas, se fa la distinción entre conflictos armatos y guerras. D'alcuerdo con iste punto de gollata, un conflicto nomás sería una guerra si os belicherants han feito una declaración formal de guerra.

En o curso d'a historia, bi ha habito guerras por o control d'os recursos naturals, por razons relichiosas u culturals, por mantener u cambear balanzas de poder, por cuestions de legalidat, ta eslindar pleitos economicos u territorials, u por atras causas. A sobén, as razons que levan a la guerra entre dos estaus son complexas, pero cheneralment tien una important influencia o factor economico.

Militarment, l'obchectivo en a guerra ye a victoria sobre o enemigo. Por ixo, cal establir una superioridat armamentistica y humana, que obligue a lo contrario a reblar u a proposar un armisticio. A practica totalidat de guerras causan gran numero de victimas, no nomás entre os combatients, sino tamién en a población civil. Amás, as guerras tamién producen graves violacions d'os dreitos humans. Encara que s'han establito convenios internacionals ta limitar a mortalidat causata en as guerras, y guaranciar un tracto digno a los prisioners, istas convencions s'ignoran muito a sobén en a practica.

A diferencia entre a guerra en apariencia y a guerra en a practica se basa en que as partis en conflicto miran de mantener una imachen d'honor y lechitimidat d'a suya causa, mientres practican una sistematica transgresión de tota norma de respeto humán. A guerra parte d'a visión mas extrema de que a fin chustifica os medios.

1. ↑ (es) Francho Nagore Laín: Vocabulario de la Crónica de San Juan de la Peña (versión aragonesa, s. XIV), Universidat de Zaragoza, 2021, ISBN 978-84-1340-315-1, p.261