Matricula

Una matricula^[1] ye una combinación de números, letras u d'as dos cosas, que identifican a belún u bella cosa. Cuan se tracta d'autos, vaixiellos o avions, que circulan librement y s'han d'identificar en cualsiquier momento, se pintan u penchan en a superficie d'o vehíclo.

En o caso d'os autos y d'atros vehíclos con una cilindrada minima, a mayoría de países obligan a portiar una placa con a matricula en a parti frontal y unatra en a posterior. Existindo dos sistemas pa obtener-las: en un d'éls, as placas de matricula son fabricadas y emitidas por as autoridaz de trafico (eix: Alemanya, Suiza y a mayoría de países americanos); y en l'atro, as autoridaz asignan a combinación que identifica o vehíclo y as placas han de mercar-se en establimientos autorizaus (eix: Espanya u Francia).

En o caso espanyol as letras y numeros son asignaus a cada vehíclo por as autoridaz de trafico en l'inte d'a venda d'o vehíclo, antis que iste circule por a vía publica. A combinación de letras y numeros ye exclusiva de cada vehíclo, de modo que iste siempre podrá estar identificau.

En bels países a matricula reflecta a localidat, a rechión, a provincia u o estau de residencia d'o propietario d'o vehíclo. En as antigas placas automovilisticas, emplegadas dica l'anyo 2000, as provincias aragonesas s'identificaban por as letras "HU" (provincia de Uesca, en castellano Huesca), "TE" (provincia de Teruel, "TER" dica 1926) y "Z" (provincia de Zaragoza).

1. ↑ (an) Diccionario aragonés-castellano-catalán. Versión preliminar. Estudio de Filología Aragonesa. Edacar num. 14. Zaragoza. Edicions Dichitals de l'Academia de l'Aragonés. ISSN 1988-8139. Octubre de 2024.