Tanque

Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla.

Un tanque u carro de combate y a vegatas tamién dito carro blindato u simplament blindato, ye un vehiclo militar armato y blindato y con un sistema de tracción tot terreno.^[1] Os primers vehiclos que feban parti de l'exercito britanico mientres a Primera Guerra Mundial; apareixioron como una respuesta frent a las dificultaz que teneba a infantería convencional cuan heba d'atacar as buegas protechitas por filo de fierro de punchas y metralladoras, contra as que a sobén fracasaba.^[2]

O nombre de tanque (en anglés tank, deposito) apareixió en as fabricas britanicas: os treballadors deciban asinas a iste tipo de vehiclos porque creyeban que yeran construyindo depositos d'augua móbils; a lo prencipio, istos vehiclos de combate se camuflaban como depositos de combustible. Os primers tanques no yeran muit efectivos ya que s'estorbaban con prou facilidat, yeran poco blindatos y facilment destruyitos con granadas de mán. O tanque d'a Primera Guerra Mundial no yera un arma muit contundent.^[2] Mientres a Segunda Guerra Mundial destacan os Panzer, que yeran os carros de combate d'a Wehrmacht; os primers en portiar radio y que feban servir tacticas de combate mas elaboratas. A importancia que tenioron os tanques mientres a Segunda Guerra Mundial se reflecta en os datos d'a producción sovietica, que gosó fabricar bels 80.000 tanques.^[3] Dende a postguerra se desarrolla o tipo dito MBT (de l'anglés main battle tank, "carro prencipal de batalla")^[4] con canyons de gran calibre, bien blindato y capable de luitar tanto en una guerra quimica como en una nucleyar.^[5]

Istos vehiclos, de traza progresiva, han ito encorporando tot tipo d'innovacions tecnolochicas, como los ordinadors y sistemas de visión nocturna.

Os soldatos que forman o personal que s'encarga d'un tanque gosan estar a sobén cuatre: o conductor, o cargador d'o canyón, l'artillero y o comandant d'o carro, anque en os mas modernos con sistema automatico de carga no cal o cargador, y a tripulación ye de nomás tres personas.

1. ↑ von Senger und Etterlin, Dr. F. M. (1960), The World's Armoured Fighting Vehicles, London: Macdonald & Co. (Publishers) Ltd.
2. ↑ ^{2,0 2,1} (en) Deighton, Len (1979): Blitzkrieg: From the rise of Hitler to the fall of Dunkirk, Fakenham: Fakenham Press Limited, ISBN 0-224-01648-2
3. ↑ Cooper, Matthew y Lucas, James (1979), Panzer: The Armoured Force of the Third Reich, Book Club Associates
4. ↑ ZTZ99 (Type 99) Main Battle Tank(en)
5. ↑ Col. Eshel, David (2007), Assessing the performance of Merkava Tanks, Defense Update, [2]. Recuperato lo 16 de mayo de 2008