Termodinamica

Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla.

A termodinamica (d'o griego θερμo-, termos, que significa "calor"^[1] y δύναμις, dinamica, que significa "fuerza"^[2]) ye una branca d'a fisica que estudeya os efectos d'os cambios d'a temperatura, presión y volumen d'os sistemas fisicos a un ran macroscopico. Alto u baixo, calor significa "enerchía en transito" y dinamica se refiere a lo "movimiento", por lo que, en esencia, la termodinamica estudeya la circulación d'a enerchía y como a enerchía creya movimiento. Asinas, estudeya os fenomenos fisicos relacionatos con a calor y a temperatura, ye decir, o movimiento desordenato d'as particlas que forman a materia. Historicament, a termodinamica se desembolicó a partir d'a necesidat d'aumentar a eficiencia d'as primeras maquinas de vapor.

O punto de partita ta la mayor parti d'as consideracions termodinamicas son as leis d'a termodinamica, que postulan que a enerchía puet estar intercambiata entre sistemas fisicos en forma de calor u treballo. Tamién se postula a existencia d'una magnitut dita entropía, que puet estar definita ta cualsiquier sistema. En a termodinamica s'estudeyan y clasifican as interaccions entre diversos sistemas, feito que leva a definir conceptos como sistema termodinamico y o suyo entorno. Un sistema termodinamico se caracteriza por as suyas propiedaz, relacionatas entre si a traviés d'as ecuacions d'estato. Istas se pueden combinar ta exprisar a enerchía interna y os potencials termodinamicos, útils ta determinar as condicions d'equilibrio entre sistemas y os procesos espontanios.

Con istas ainas, a termodinamica describe como los sistemas responden a los cambios en o suyo entorno. Isto se puet aplicar a una ampla variedat de temas de ciencia y incheniería, como motors, transicions de fase, reaccions quimicas, fenomenos de transporte, y mesmo foratos negros. Os resultatos d'a termodinamica son esencials ta atros campos d'a fisica y a quimica, incheniería quimica, incheniería aeroespacial, incheniería mecanica, biolochía celular, incheniería biomedica, u a ciencia de materials por nombrar-ne beluns.

1. ↑ Seguntes a RAE
2. ↑ Seguntes a RAE