Conquista normanda d'Inglaterra

La conquista normanda d'Inglaterra foi la invasión y ocupación d'Inglaterra nel sieglu XI por un exércitu formáu por normandos, bretones y franceses lideráu pol duque Guillermu II de Normandía. Guillermo ganó a Haroldo II d'Inglaterra el 14 d'ochobre de 1066 na batalla de Hastings y foi coronáu como rei d'Inglaterra'l día de Navidá d'esi añu. De siguío, consolidó'l so control sobre Inglaterra estableciendo a munchos de los sos siguidores na isla, lo que tamién supunxo la introducción de numberosos cambeos políticos, económicos y sociales na Inglaterra medieval.

Guillermo reclamó'l tronu inglés amparándose nel so parentescu col rei anglosaxón Eduardo'l Confesor, que nun tenía descendencia, circunstancia qu'afaló les esperances del normandu de consiguir el so entronización. Eduardo morrió en xineru de 1066 y asocedió-y el so hermanascu Haroldo, pero esti tuvo qu'encarar, amás del desafíu de Guillermo, la reclamación al tronu inglés del rei Harald III de Noruega. Harald invadió'l norte d'Inglaterra en setiembre de 1066 y consiguió una victoria na batalla de Fulford antes de ser ganáu por Haroldo na batalla de Stamford Bridge el 25 de setiembre d'esi añu. Sicasí, Guillermo desembarcara nel sur y Haroldo coló rápido hacia pa ellí pa face-y frente, anque dexando munches de les sos fuercies nel norte. El 14 d'ochobre ambos exércitos topetaron cerca de Hastings, y tres tou un día de llucha, Haroldo resultó derrotáu y morrió en combate.

Anque Guillermo esanició al so principal rival, inda tuvo qu'enfrentase a numberoses rebeliones nos años siguientes, polo qu'hasta 1072 nun pudo afitase nel tronu. La resistencia inglesa llevó a que gran parte de la élite británica perdiera les sos tierres y hubiera de exiliase. Col fin de controlar el reinu, Guillermo dio tierres a los suyos y construyó fortaleces y castiellos per tol país. Los conquistadores introducieron la llingua francesa y remocicaron la composición de les clases altes. Nun ta claro hasta qué puntu esta conquista influyó nel pueblu llanu inglés, pero un cambéu importante foi l'abolición de la esclavitú ^{[ensin referencies]}. Coles mesmes, hubo pocos cambeos na estructura de gobiernu, pos los invasores normandos adoptaron munches de les formes del dominiu anglosaxón.