Vespidae

Vespidae
Clasificación científica
Reinu:	Animalia
Filu:	Arthropoda
Clas:	Insecta
Orde:	Hymenoptera
Suborde:	Apocrita
Superfamilia:	Vespoidea
Familia:	Vespidae
Subfamilias
Eumeninae Euparagiinae Gayellinae Masarinae Polistinae Stenogastrinae Vespinae Zethinae
Consultes
[editar datos en Wikidata]

Los véspidos (Vespidae) son una familia d'inseutos himenópteros apócritos, cosmopolita y diversa (alredor de 5.000 especies) qu'inclúi a casi toles viéspores o aviespes eusociales conocíes, asina como munches aviespes solitaries. Estrémense d'otres families cercanes, dacuando tamién denominaes de manera xenérica aviespes, porque plieguen les ales en reposu. Les pates son de llongura normal, non tan llargues como les de la familia Pompilidae.^[1]

Munches especies visiten flores y puxen polen contribuyendo asina a la polinización de ciertes plantes, otru son útiles como predadores d'inseutos, munchos de los cualos son consideraos dañibles.^[2]

Los niales de munches especies (especialmente solitaries) tán fechos de folla, pero la gran mayoría de los Vespinae, Stenogastrinae y Polistinae (grupos sociales) utiliza frebes vexetales mazcaes pa formar una especie de papel. Dientro de la subfamilia Vespinae, les del xéneru Vespula faen los sos niales nel suelu, les Dolichovespula fáenlos en cañes d'árboles, etc., les del xéneru Vespa tienden a faelos en buecos de tueros d'árboles, o de parés o techos d'habitaciones humanes.

Na actualidá esta familia subdivídese en seis subfamilies aparentemente monofilétiques. Les subfamilies Polistinae y Vespinae contienen solamente especies eusociales, ente qu'Eumeninae, Euparagiinae y Masarinae son toes solitaries; Stenogastrinae contién una variedá de formes dende solitaries a sociales.

La Euparagiinae, que güei amuesa una distribución restrinxida, atopábase bien espardida pel Cretácicu. El patrón bioxeoráficu de la Masarinae, pela so parte, correspuende a les primeres fases del rompimientu de Gondwana, cuando Suramérica, África y Australia formaben un solu supercontinente. Piénsase que les aviespes eusociales (Stenogastrinae, Polistinae, Vespinae) pudieron surdir cuando la fragmentación de Gondwana taba yá bien avanzada.

Nes subfamilies Polistinae y Vespinae los adultos mazquen la presa primeramente a suministrala a los bárabos. De la mesma los bárabos producen un líquidu claro, ricu en proteínes que los adultos peracaben. La concentración exacta d'aminoácidos ye variable pero considérase qu'apurre una parte considerable del alimentu de los adultos.^[3]

1. ↑ Pickett, Kurt M., and John W. Wenzel (2004). Phylogenetic Analysis of the New World Polistes (Hymenoptera: Vespidae: Polistinae) Using Morphology and Molecules. Journal of the Kansas Entomological Society 77(4):742-60.
2. ↑ Sühs, R.B.; Somavilla, A.; Putzke, J.; Köhler, A. (2009). Pollen vector wasps (Hymenoptera, Vespidae) of Schinus terebinthifolius Raddi (Anacardiaceae), Santa Cruz do Sul, RS, Brazil. Brazilian Journal of Biosciences 7(2):138-143. Link: http://www.ufrgs.br/seerbio/ojs/index.php/rbb/article/view/1123
3. ↑ Hunt, J. H.; I. Baker; and H. G. Baker. (1982). Similarity of amino acids in nectar and larval saliva: the nutritional basis for trophallaxis in social wasps. Evolution 36: 1318-1322