Rosa Luxemburg

De Rosa Luxemburg (* 5. Meaz 1871 oiss Rozalia Luksenburg in Zamość (Kenigreich Poin); † 15. Jenna 1919 in Berlin) woa a eiflussreiche marxistische Theoretikarin, Philosophin und Soziäurevolutionärin. Sie woa vau poinisch-jidischa Obstaumung und is deitsche Stootsbiagarin wuan. Sie woa zeascht Mitglied vau da Soziäudemokratischn Partei vo Poin und Litauen, vau da Soziäudemokratischn Partei vau Deitschlaund (SPD) und vau da Kommunistischn Partei vau Deitschlaund (KPD).

Ob 1887 hod de Luxemburg in da poinischn und ob 1898 aa in da deitschn Sozialdemokratie midgwiakt. Do hods vau Aufaung au in Nationalismus, Opportunismus und Revisionismus bekämpft. Sie hod si fia Massnstreiks (Genaräustreik) eigsetzt zua Vahindarung vau Kriag und zua politischn Vaendarung. Glei nochn Aufaung vaum Easchtn Wödkriag hods de „Gruppe Internationale“ grindt, aus dea da Spartakusbund aussagaunga is. Zauman midn Karl Liebknecht hods den Bund gfiad und vua oim duach politische Schriftn zum Moanungsbüd beidrong. De Oktoberrevolution hod sie untastitzt owa gleichzeitig de Parteidiktatur vaum Lenin und vau de Bolschewiki kritisiad. Am 14. Dezemba 1918 de Luxemburg ois Autorin vaum Programm vaum Spartakusbund a Räterepublik gfoadad und de Entmochtung vaum Mülitea. Aufaung 1919 hods de Kommunistische Partei Deutschlands midgrindt. Noch da Niedaschlogung vaum Spartakusaufstand, san sie und da Karl Liebknecht vau Aughearign vau da Garde-Kavallerie-Schützen-Division umbrocht wuan.