Michelangelo

Si Michelangelo di Lodovico Buonarroti Simoni (Marso 6, 1475 - Pebrero 18, 1564) sarong pintor, eskultor, arkitekto, inhenyero, asin poeta sa panahon na Renaissance. Sinasabi na an talento asin abilidad niya sa mga disiplinang saiyang pigkasibotan nakaarog nanggad ki Leonardo Da Vinci.

Nabistong gayo si Michelangelo sa paggibo kan fresco sa Kapilya nin Sistine, an Huring Pagsisilot sa altar igdi, an "An Pagkamartir ni San Pedro" asin "An Pagbagong boot ni San Pablo" sa Cappella Paolina sa Batikano. Siring man saiyang haman an David asin an Pieta, an Birhen, Bacchus, Moises, Rachel, Leah, mga eskulturang bantogan na gayo. An simboryo kan Basilika ni San Pedro siya man an nagdesenyo.

Nano'dan ni Michelangelo an arte sa pagpinta kan siya nag'erok sa Florencia sa edad na sampolo may apat. Natais niyang maray an pagpinta sa bodega ni Domenico Ghirlandaio manta na inaarog niya an mga gibo kan si mga nakaaging bantogan na mga pintor kan Florencia arog ka Giotto asin Masaccio. An talento niya sa eskultura nano'dan niya sa hardin ni Lorenzo il Magnifico kun saen dakul mga antigong estatuwa asin rebulto, asin an abilidad niyang ini sa pag'arog iyo an enot na nagpabantog saiya. Kan magadan si Magnifico (1492), si Michelangelo nagbaya' na sa banwang ginikanan niya, nagpasiring sa Venecia asin Bologna asin duman tinapos niya an "Arco di San Domenico".

An hinaman ni Michelangelo sa lambang disiplinang nano'dan niya sa lawig kan saiyang buhay sinasabing pambihira asin kadakul talaga; an mga nawalat na mga kasuratan, mga ginuhit asin mga pagromdom manongod saiya nagpapatotoo lamang na siya na an pinaka'dokumentadong personahe sa ika-16 na siglo. Duwa sa bistong maray na obra niya, an Pieta asin David, saiyang pig'eskultor kan siya dai pa na'edad trienta. Si Michelangelo an tinata'wan kredito kan duwa sa pinaka may impluwensyang obra sa fresco sa historya nin Arteng Solnopan: an tanawon kan Genesis na yaon sa kisame asin an Ultimong Pagsisilot sa altar kan Kapilya nin Sistine sa Roma. Bilang arkitekto, siya an kagpoon kan inapod na istilong Mannerista sa Biblioteca Laurentian. Sa edad na 74, siya an nagsangle ki Antonio da Sangalio na Hubin komo arkitekto kan Basilika ni San Pedro. Si Michelangelo pinaghira an plano, an bandang solnopan natapos susog sa desenyo niya asin an simboryo nahaman na may diit na paghira kan siya nagadan na.

Sa pagpatotoo kan saiyang napapalaen na kabantogan, siya an pinaka'enot na artistang taga-Solnopan na an biograpiya pinalagda' manta na siya buhay pa.^[1] Duwa kaini pinublikar, saro gibo ni Giorgio Vasari na nagtaram na si Michelangelo na an nagdadara kan pinaka'alitoktok nin artistikong kahamanan sa pagpoon kan Renaissance, sarong punto de vista na nagdanay sa historya nin arte nin pirang siglo. Sa panahon niya, siya parati binabansagan na Il Divino ("an Langitnon"). Saro daa sa kalidad na admiradong maray kan saiyang kagurubay iyo an saiyang "terribilista", sarong "nakaka'ara' na pagmateng kadakulaan" an pinupukaw sa mga naghihiling sa saiyang mga obra. Dakul na nagsurunod na mga artistang nag'ngata' na arogon an saiyang makuri asin sobrang personal na istilo na nagbunga kan istilong Mannerismo, an sinasabing nagbutwang mayor na hiron sa Arteng Solnopan sunod sa inapod na 'High Renaissance'.

1. ↑ Michelangelo. (2008). Encyclopædia Britannica. Ultimate Reference Suite.