Tata Surya

Tata Suria^[a] adalah garumbung banda langit nang tasusun matan sabuting bintang nang disambat matahari wan samunyaan upjik nang tajarat lawan gaya garapitasinya. Upjik-upjik ngitu tamasuk walung palanit nang sudah dikatahuani baurbit babantuk ilips, lima palanit kihit, 173 satilit alami nang sudah dipinandui, wan jutaan banda langit (mitiur, astiruit, kumit) nang lain.

Tata suria tabagi jadi matahari, ampat palanit palih dalam, sabuk asteroid, ampat palanit palih luar, wan di palih paluarnya ada Sabuk Kuipar wan pipiringan basapai. Awan Oort disangka baandak di dairah panjauhnya nang bajarak bangsa saribu kali di luar palih nang paluaran.

Bapandal jaraknya matan di matahari, kawalu buting planet Tata Surya ialah Merkurius (57,9 juta km), Venus (108 juta km), Bumi (150 juta km), Mars (228 juta km), Jupiter (779 juta km), Saturnus (1.430 juta km), Uranus (2.880 juta km), wan Neptunus (4.500 juta km). Tumatan di panangahan tahun 2008, ada lima upjik rakun nang dikalasipikasi'akan sawagai palanit kihit. Urbit palanit-palanit kihit, kacawali Ceres, andakannya tajauh pada Neptunus. Kalima buting palanit kihit ngitu adalah Ceres (415 juta km. di sabuk astiruit; bahari dikalasipikasiakan sawagai palanit kalima), Pluto (5.906 juta km.; bahari dikalasipikasiakan sawagai palanit kasanga), Haumea (6.450 juta km), Makemake (6.850 juta km), wan Eris (10.100 juta km).

Anam tumatan kawalu buting palanit wan talu tumatan kalima buting palanit kihit ngitu dikulilingi ulih satilit alami, nang rancak disambat "bulan" sasuai lawan Bulan atawa satelit alami Bumi. Masing-masing palanit palih luar dikulilingi ulih utas palanit nang tasusun ulih dabu wan partikal nang lain.