Lizherenneg siriek

Implijet e veze al lizherenneg siriek evit skrivañ ar sirieg adal an 2 kantved a-raok ar varevezh voutin. Un abjad an hini eo evel an darn vrasañ eus an doareoù-skrivañ implijet gant ar yezhoù semitek, bet diorroet diwar stumm red lizherennoù al lizherenneg fenisek.

Skrivet e vez al lizherennoù a dehoù da gleiz hag stag an eil ouzh eben peurliesañ. Stummoù disheñvel o deus lizherennoù zo hervez ma vezont implijet e pen-kantañ ur ger, en diwezh pe etre lizherennoù all.

Bez ez eus 22 lizherenn kensonennel ha ret eo d'an hini a lenn divinout ar vogalennoù a vank keit ha na vez ket implijout sinoù ispisial evit o diskouez en un doare resisoc'h.

Tri doare pennañ disheñvel ez eus evit skrivañ al lizherenneg siriek

• Estrangelā (diwar ar gresianeg στρογγυλη “ront”). Hennezh eo an doare koshañ ha klasel. Ne vez ket implijet ken an doare-skrivañ-mañ evit skrivañ ar sirieg en un doare ordinal;

• Sertā (“linenn”), anvet ivez lizherenneg siriek ar c'hornôg pe c'hoazh lizherenneg maronitek pe jakobitek. Anat eo e oa bet diorroet diwar patrom an estrangela, met eeunoc'h eo lizherennoù ar stil-mañ hag a oa bet savet al lizherenneg nabateek, orin al lizherenneg arabek, diwarnañ. Peurliesañ e vez diskouezet ar vogalennoù dre implijout lizherennoù gresianek bihan a-us, a-is pe goude ar c'hensonennoù: Α (pennlizherenn) evit a hag al lizherenn vihan (α) evit ā (distaget o), ε (lizherenn vihan) evit e hag ē, Ι (pennlizherenn) evit ī hag Υ (pennlizherenn) mui o) (lizherenn vihan) evit ū.

• Madnhāyā (“reter”), anvet ivez lizherenneg asiriek, c'haldeek pe c'hoazh nestorek diwar ul lesanv implijet gwechall evit kunujenniñ ar gristenien a veve e Impalaeriezh Persia. Tostoc'h eo stumm lizherennoù ar stil-mañ ouzh re an estrangela. Implijet e vez ur sistem pikoù ispisial evit diskouez ar vogalennoù a ranker distagañ.