Gremmi

"Gremmi" (inglizce Grammy Awards) – AQŞ Sesyazma şirketleri assotsiatsiyası tarafından 1958 senesi martnıñ 14-ünde tesis olunğan Amerika sesyazma akademiyasınıñ tarafından taqdim etilgen muzıka mukâfatı. Zemaneviy muzıka dünyasında eñ şerefli mukâfatlarından biridir, onı kinematografiya saasında "Oskar" degen mukâfatınen ölçeştirmek mümkündir, em de "Gremmi"ge kimerde bir "muzıka Oskarı" da deyler.

1957 senesi Los Anceleste Tomas Edisonnıñ yaratqan grammofonınıñ 80 yıllığı bayram etilgen vaqtında, professional çalğıcılarnıñ tarafından "Gremmi" mukâfatını yaratuv ğayesi peyda olğan edi, tamam bu sebepten de mukâfat eykelçiginiñ şekli – ufaq yaldızlı grammofondır.

Birinci mukâfat berüv tedbirini 1958 senesi Frenk Sinatra açqan edi, o da soñra "Gremmi" mukâfatına eki kere irişken edi. Tantanalı mukâfatlandıruv tedbirini ötkermek aqqı oğrunda daima Los Anceles ve Nyu York küreşe.

"Gremmi" AQŞnıñ milliy ğururıdır, çünki "Gremmi" mukâfatı çeşit türlü tarzlarda işlengen çalğıcılar, yırcılar, bestekârlarnıñ muvafaqiyetlerini mıtlaq qayd ete, em de şu mukâfat berilüvi 20 biñge yaqınlaşqan Amerika sesyazma akademiyası azalarınıñ qararına bağlıdır.

Er sene 108 kategoriyada 30-ğa yaqın türlü muzıka janrlardan sesyazma akademiyasınıñ vekâletli azaları rey berilgen neticesinde "Gremmi" mukâfatı berile. Rey aqqı bar olğan adamlarnıñ arasında muvafaqiyetli ve tanılğan artistler, ses müendisleri: Con Bon Covi, Prins, Pol Saymon, Nora Cons, Beyonse. "Ayatiy yeñişler oğrunda Gremmi mukâfatı" (inglizce Grammy Lifetime Achievement Award) biraz ayrıca tura, o muzıkağa salmaqlı isse qoşqan içün ayrı bir mukâfattır.

2015 senesi fevralniñ 8-inde endi 57-nci "Gremmi" mukâfatlandıruv tedbiri "Staples Center" degen yerde Kaliforniyadaki Los Anceles şeerinde ötkerildi.