Standertstasjons fan de Steatsspoarwegen

Tusken 1860 en 1873 waarden lâns de troch de Steat fan de Nederlannen oanleine spoarlinen tal fan stasjonsgebouwen neffens in standertmodel boud. Fan 1863 ôf waarden de measte eksploitearre troch de Maatskippij ta Eksploitaasje fan Steatsspoarwegen (SS), allinnich de line Den Helder - Amsterdam kaam by de HIJSM yn eksploitaasje. De stasjons waarden boud troch de oerheidstsjinst Rykswettersteat, hja prate dan ek wol fan "Wettersteatstasjons". Standerdisaasje hie as doel it ferheegjen fan it boutempo en it goedkeaper bouwen, mar beäntwurde tagelyk oan de winsk om de útstrieling fan de gebouwen lâns it spoar te uniformearjen. De yndieling yn klassen gie oer de grutte fan it stasjon. De klasse wie relatearre oan it tal ynwenners fan it plak dêr 't it stasjon komme soe. It type SS earste klasse wie it grutste model, bestimd foar gruttere provinsjestêden. Type SS fiifde klasse wie it lytste model. De arsjitekt wie de spoarwei-ynzjenieur Karel Hendrik van Brederode. Alline it ûntwerp fan it type SS earste klasse wie fan arsjitekt Nicolaas Johannes Kamperdijk.