Hospital Real de Santiago de Compostela

Hospital Real de Santiago de Compostela
Hospital Real de Santiago de Compostela
Edificio
Nome inicial	Gran Hospital Real
Tipo	Hospital, hospicio
Estilo	Renacentista, plateresco
Enderezo	Praza do Obradoiro
Localización	Santiago de Compostela
Coordenadas	42°52′53″N 8°32′45″O / 42.881388888889, -8.5458333333333
Uso(s)	Parador de Santiago
Construción
Inicio	1492
Construción	1501
Remate	1511
Remodelación	século XVII
Dimensións
Plantas	planta terrea e tres andares
Equipo
Arquitecto(s)	Henrique Egas (tamén Martín de Blas e Guillén Colás)
[ editar datos en Wikidata ]

O Hospital Real de Santiago, tamén coñecido como Grande Hospital Real de Santiago e, nos últimos tempos, como Hospital Xeral de Santiago, ten a súa orixe nunha viaxe que fixeron os Reis Católicos a Santiago de Compostela en 1492, na que advertiron que nesa cidade, a pesar de que contaba con numerosos pequenos hospitais, os peregrinos enfermos estaban mal atendidos, o que os impulsou á creación dun novo e moderno hospital.

Os peregrinos, ao presentaren a compostela dilixenciada, coa credencial debidamente cuberta^[1][2] adquirían o dereito a seren hospedados gratuitamente durante tres días. Xustamente o termo hospital refírese a esta primeira función que tiveron estas institucións. Durante a Idade Media os hospitais desempeñaban as funcións de albergar aos peregrinos ou seren asilos para os pobres. A palabra hospital deriva da latina hospes, que significa estraño ou estranxeiro e, polo tanto, un convidado; de hospes pasou a hospitalia, para significar "departamento para visitas de forasteiros", e de hospitalia derivou hospital.^[3]

Para poderen construílo e mantelo, os Reis Católicos instituíron un Real Padroádego en 1499, que dotaron cun terzo das rendas do Voto de Santiago do Reino de Granada.

1. ↑ A credencial do peregrino é un caderno de papel que se pode obter nalgúns albergues e igrexas, cuxa finalidade é o seu selado un par de veces ao día (xa sexa en igrexas, albergues ou incluso en bares que teñen o seu propio selo), para que o peregrino consiga a acreditación necesaria para aloxarse nos albergues do Camiño.
2. ↑ Os selos do camiño Arquivado 08 de febreiro de 2012 en Wayback Machine. (en varias linguas) Consultada o 3/2/2012.
3. ↑ Outro substantivo derivado é hospitium, que significa "hospitalidade", a relación entre o convidado e o que o acolle, co significado de amabilidade; de aí deriva hospicio. E os termos hospedaría, hostal, hospedaxe, hospedeiro etc.