Mono (animal)

Mono é un termo non taxonómico que designa un amplo conxunto de primates simiiformes.

Os termos mono e simio son sinónimos,^[1] pero na xerga zoolóxica adoita distinguirse entre ambos os termos por influencia do inglés, idioma no que os termos equivalentes monkey e ape teñen diferente significado.

Así, en dita xerga científica, os monos actuais comprenderían os Platyrrhini (monos do Novo Mundo) e os Cercopithecoidea (monos do Vello Mundo), pero non os primates hominoides máis próximos ao ser humano, como o orangután, o gorila, o chimpancé e os xibóns, que serían simios. A diferenza destes, os monos posúen polo xeral cola, teñen un esqueleto máis primitivo e son máis pequenos.

Este uso da palabra simio como tradución da palabra inglesa ape, restrinxida aos primates sen cola, é erróneo, e non corresponde ao galego. Sería quizais recomendábel para este uso a palabra hominoide, como se aconsella tamén en castelán.^[2]

1. ↑ Definición do Dicionario da Real Academia Galega: mono¹ -a s. 1. Mamífero de cerebro moi desenvolvido, con catro extremidades que rematan en mans, e que descende de antepasados comúns ós da especie humana. O gorila, o chimpancé etc., son monos. SIN. simio.
2. ↑ Arsuaga, J. L. e Martínez, I. (1998): La especie elegida. Barcelona: Ed. Temas de hoy, páx. 41. ISBN 84-7880-909-0.