Obodritojo

Obodritojo (němsce Abodriten, Obodriten, Obotriten, Bodrizen; pólsce Obodrzycy właściwi, Reregowie) běchu połobski kmjenowy zwjazk, kotryž sydleše wot 8. lětstotka předewšěm při Baltiskim morju w dźensnišej Mecklenburgskej a Schleswigsko-Holsteinskej.

Woni wojowachu hromadźe z germanskimi Sakskami we wójsku Korle Wulkeho přećiwo słowjanskim Wjeletam. Po smjerći Korle dóńdźe pak k zhromadnemu zběžkej mecklenburgskich a braniborskich Słowjanow přećiwo frankowskemu knjejstwu. W lěće 931 podćisny sej kral Hendrich I. Obodritow, lěto pozdźišo tež Milčanow a Łužičanow, zhubi jich kónčiny pak krótko po tym zaso. Hač do 12. lětstotka móžachu so Obodritojo přećiwo frankowsko-sakskej a danskej ekspansiji wobarać.