Islamismo

Islamismo (الاسلامية ‎al-'islāmiyya) es un categoria de movimentos politic, characterisate per le desiderio de transformar le systema politic secundo un interpretation relativemente stricte del islam. Islamistas reclama le unification politic de musulmanes mundial sub un eventual califato restorate, e le reinfortiamento del lege islamic in paises musulman. Wahhabismo e le ideologia del Fraternitate Musulman son precursores importante del islamismo.

Le islamismo moderne ha devenite un major fortia politic essentialmente depois le annos 1970, sur toto gratias al politica religiose de Zia-ul-Haq in Pakistan, al Revolution islamic in Iran, e al appoio del regime de Ronald Reagan a mujahidin in Afghanistan pro combatter le Sovieticos. Le rete de islamistas anti-sovietic in Afghanistan faceva postea nascer al-Qaeda, que floriva in association con le Taliban (le militia islamista que controlava Afghanistan inter 1996 e 2001). Le attaccos de al-Qaeda contra le Statos Unite le 11 de septembre 2001 inspirava un nove unde de activitate islamista militante.

Le termino «islamismo» es communmente associate con methodos violente, includente terrorismo, ben que alcun gruppos islamista sia non violente. On associa anque islamistas a takfiris, qui denuncia como apostatas celles qui non accorda con principios fundamentalista; totevia, sol un parte del movimento islamista es takfiri.

Alcun movimentos politic, como le AK Parti in Turchia, ha un certe affiliation historic con islamismo ma non se considera ja como islamista. Lor opponentes domestic los accusa de haber ancora un agenda islamista.

Il es anque a notar que, a un epocha anterior, on usava le termino «islamismo» simplemente pro significar «islam» (al analogia de christianismo, buddhismo, etc.). Iste uso obsolesceva ante le Prime Guerra Mundial. Depois le annos 1970, il es normal distinguer inter islam (un religion) e islamismo (un movimento politic o mesmo militar).

Wikimedia Commons ha files multimedia de: Islamismo