Lokaco

Lokaco esas negociado e kontrato inter individui, inter individuo ed entraprezo, inter entraprezi o mem inter landi, per qua un ek la parti cedas imoblo, vehilo od altra kozo ad altru, kambie pago di rento, ordinare dum certena periodo. Ordinare facesas lokaco-kontrato por protektar la signatanti, se ula parto ne cedas l'imoblo o kozo, o se l'altru ne pagas segun kombino. La kontrato anke stipulas en quala kondicioni l'imobli o kozo cedesos, exemple: se l'imoblo e kelka mobli (liti, sofai, frigorizilo, edc.) cedesos kune; se l'automobilo mustas retrosendesar kun fuelo-tanko riplenigita dal lokacero, edc. En multa landi ca kontrati traktesas quale "lego inter partes", esanta posibla procesar judiciale ulu qua ne exaucas sua obligi kontratala.

Individui od entraprezi povas decidar pri lokaco di imoblo o kozo vice komprar ol pro diversa motivi, exemple kande ol bezonas l'imoblo, la vehilo o la kozo por kurta periodo, o ne havas suficanta pekunio por komprar ol, o la kusti por mantenar l'imoblo o kozo esas granda (exemple, kande entraprezo decidas lokacar automobili o kamioni vice komprar li e spensar multe kun lua periodala manteno, edc).