Queens

Queens esas la maxim estala e granda (segun areo) de la kin distrikti di Nov-York-Urbo.

Ol geografiale adjacas la distrikto Brooklyn en la sudwesta parto di Long Island, e komtio Nassau plu fore este en Long Island; pluse, Queens havas aquo-frontieri kun la distrikti Manhattan e la Bronx.  Equivalanta komtio Queens depos 1899, Queens esas la duesma maxim granda distrikto segun habitantaro (dop Brooklyn) kun evaluita 2.339.150 rezidanti en 2015, cirkume 48% de li naskinta en exterlando.  La komtio Queens esas anke la duesma maxim populoza komtio en la stato Nov-York, dop la vicina Brooklyn.

Queens esas la quaresma maxim dense popuoza komtio en Nov-York-Urbo, anke en Usa.  Se la distrikti di Nov-York-Urbo esus nedependanta urbi, Queens esus la quaresma maxim populoza urbo en Usa, dop Los Angeles, Chicago e Brooklyn.  Queens esas la maxim etniale diversa urbana areo en la mondo.

Queens establisesis en 1683 kom un ek la originala 12 komtii di Nov-York.  Ol nomizesis pro la portugalana princino Katarina di Braganza (1638–1705), rejino di Anglia, Skotia ed Irlando.  Ol divenis distrikto di Nov-York-Urbo en 1898, e de 1683 til 1899, la komtio Queens inkluzis la nuna komtio Nassau.

Queens havas la maxim diversa ekonomio del kin distrikti di Nov-York-Urbo.   Ol esas la hemo di JFK International Airport e LaGuardia Airport.  Ica aeroportui esas inter la maxim uzata en la mondo, e la aerospaco super Queens esas la maxim uzata en Usa.  Atraktivi en Queens inkluzas Flushing Meadows Park, Citi Field (hemo dil basbal-esquado New York Mets), laUS Open tenis-turniro, Kaufman Astoria Studios, Silvercup Studios ed Aqueduct Racetrack.  La distrikto havas diversa rezideyi, de alta apartament-edifici en la urbana arei di westa e centrala Queens, quala Jackson Heights, Flushing, Astoria e Long Island City, a preurbana vicineyi en la esta parto dil distrikto quala Little Neck, Douglaston e Bayside.