Hibatullah Akhundzada

Hibatullah Akhundzada (pastú: ھیبت الله اخوندزاده‎; f. 1961) er afganskur múslimaklerkur sem er þriðji og núverandi leiðtogi Talíbanahreyfingarinnar. Sem leiðtogi Talíbana hefur Akhundzada í reynd verið þjóðhöfðingi Afganistans frá því að Talíbanar lögðu undir sig höfuðborgina Kabúl í ágúst 2021.

Akhundzada tók við sem leiðtogi Talíbana eftir að forveri hans, Akhtar Mansúr, var drepinn í drónaárás Bandaríkjamanna árið 2016.^[1] Hann hafði áður verið yfirmaður dómstóla Talíbana og hægri hönd Mansúrs. Hann hefur fremur verið talinn trúarlegur leiðtogi en herforingi.^[2]

Eftir að Talíbanar tóku yfir Kabúl og endurheimtu stjórn á Afganistan í ágúst 2021 tilkynnti hreyfingin að Akhundzada væri staddur í Kandahar og myndi brátt koma opinberlega fram.^[3] Hann ávarpaði stuðningsmenn sína opinberlega í fyrsta skipti þann 31. október 2021 í Kandahar.^[4]

Akhundzada lýsti yfir að sjaríalög yrðu tekin upp í Afganistan á ný eftir fund með dómurum í landinu þann 14. nóvember 2022.^[5]

1. ↑ Tryggvi Páll Tryggvason (25. maí 2016). „Talibanar skipa nýjan leiðtoga“. Vísir. Sótt 1. september 2021.
2. ↑ Kristján Róbert Kristjánsson (25. maí 2016). „Nýr leiðtogi talibana í Afganistan“. RÚV. Sótt 10. janúar 2022.
3. ↑ „Æðsti leiðtogi talíbana staddur í Afganistan“. mbl.is. 29. ágúst 2021. Sótt 1. september 2021.
4. ↑ „Fyrsta ávarp æðsta leiðtoga talíbana“. mbl.is. 31. október 2021. Sótt 2. júlí 2022.
5. ↑ Róbert Jóhannsson (14. nóvember 2022). „Talibanar innleiða sjaría-lög að fullu“. RÚV. Sótt 15. nóvember 2022.