Cita

Cita, po sita po ker, yw kemeneth gans meur a dus, drehevyansow ha fordhow. Brassa ages tre yw.

Yma dhe'n brassa rann a sitys kevreythow efan rag anedhyans, treusporth, glanythter, gwasonieth boblek, askorra gwara ha keskomunyans. Aga thewder a wra esya ynterweythresow yntra tus, an governans ha negysyow ha gwellhe an effeythuster a lesrannans gwara ha gonisyow. Herwydh usadow yma kresen dre dhe sitys le may hwer negys ha governans ha mestrevow le may ma trigys tus yn-mes a gres an cita.

Yn istori, trigoryon yn sitys re beu rann vyghan a dhenses yn ollgemmyn, mes, wosa dew gansvledhen a trevekheans uskis na veu bythkweth kyns, yma moy es hanter poblans an bys trigys yn sitys. Hemm a gawsyas sewyansow posek rag sostenadewder ollvysel.

Y'n Ruvaneth Unys, studh cita yw grontys gans an myghtern po an vyghternes dhe vagas dewisys a gemenethow. A-dhia 2014, yma 69 cita y'n Ruvaneth Unys – onan (Truru) yn Kernow, 50 yn Pow Sows, hwegh yn Kembra, seyth yn Alban ha pymp yn Iwerdhon Gledh. Kyn nag eus gwiryow arbennik dhe'n dra, studh cita a yll bos arwodh a roweth ha ri gooth leel dhe'n gemeneth.

Nyns yw an studh grontys yn awtomatek herwydh neb nas settys, mes yn Pow Sows hag yn Kembra y feu grontys herwydh hengov dhe drevow gans penneglosyow epskobedhek.

Yma'n erthygel ma owth usya an Furv Skrifys Savonek a-barth Kernowek kres.

Onan a'n kans erthygel posekka war Wikipedya yw an erthygel ma.