Ranneves

Ranneves yw parth a'n pel nevek gans bagas ster a wra neb po skantlyn po linennans yn tybyans miroryon. Ymons i ow representya yn fenowgh enyval, taklenn, po person po kroadur a mythologieth. ^[1]

Fentennow an rannevesow o yn kynsistori. Rannevesow o aswonnys yn Mesopotami ha gans an Hen Grekyon. Yth esa 48 a rannevesow yn ober Aratus Phenomena (3a kansvlydhen Kyns Oes Kemmyn) ha Almagest gans Ptolemi (2a kansvledhen Oes Kemmyn). Rannevesow pella o keworrys yn 15ves dhe'n 18ves kansvledhen, drefenn aga bos gwelys yn ebrenn pell soth, ha ny veu gweladow diworth dorlesow Europ.

Bagas ster na wra furvya ranneves a yll bos gelwys sterennek (Sowsnek: asterism).

Yma rannevesow erell yn gonisogiethow erell, rag ensampel an sterennegi Chinek. Yn Amerika Soth an Inka a ros henwyn dhe'n kloudys tewl yn Hyns Sen Jamys hag ynwedh an dus teythyek yn Ostrali a wrug hemma, onan a'n rannevesow tewl ma yw emu delinys yn ebrenn. ^[2]

Yn 1922, an Unyans Steronieth Keswlasek (IAU) a aswonnis rol a 88 a rannevesow yn sodhogel hag yn 1928 oryon an rannevesow a wra gorheri oll an pel nevek.

1. ↑ "Definition of constellation". Oxford English Dictionary. http://www.oxforddictionaries.com/definition/english/constellation. Ranneves
2. ↑ Gullberg, S. R., Hamacher, D. W., Martín-Lopez, A., Mejuto, J., Munro, A. M., and Orchiston, W., “A cultural comparison of the 'dark constellations' in the Milky Way”, Journal of Astronomical History and Heritage, vol. 23, no. 2, pp. 390–404, 2020.
3. ↑ Royal Australian Mint commemorative coins celebrating Indigenous astronomy