Academia Scientiarum Petropolitana

Academia Scientiarum Petropolitana^[1] (Russice Петербургская академия наук, tr. Peterburgskaja akademija nauk) sive plenior Academia Scientiarum Imperialis^[2] Petropolitana^[3] (Russice Императорская Санкт-Петербургская академия наук, tr. Imperatorskaja Sankt-Peterburgskaja akademija nauk) fuit suprema institutio scientifica Imperii Russici annis ab 1724 ad 1917.

Academia die 28 Ianuarii secundum Calendarium Iulianum (8 Februarii secundum Gregorianum) anni 1724 Petropoli condita est. In insula Basilii in ripa Nevae Maioris aedificium Academiae antiquum situm est.

Nomina huius Academiae propria fuere:

• ab anno 1724, Academia Scientiarum et Artium Petropoli (Академия наук и художеств в Санкт-Петербурге);
• ab anno 1747, Academia Scientiarum et Artium Imperialis Petropoli (Императорская академия наук и художеств в Санкт-Петербурге);
• ab anno 1803, Academia Scientiarum Imperialis (Императорская академия наук);
• ab anno 1836, Academia Scientiarum Imperialis Petropolitana (Императорская Санкт-Петербургская академия наук).

Praesides academiae, ab imperatoribus Russicis assignati, fuere:

• annis ab 1725 ad 1733, Laurentius Blumentrost;
• annis ab 1733 ad 1734, Hermannus Carolus de Keyserlingk;
• annis ab 1734 ad 1740, Ioannes Albertus de Korff;
• annis ab 1740 ad 1741, Carolus de Brevern;
• annis ab 1746 ad 1798, Cyrillus Rasumowski;
• annis ab 1798 ad 1803, Henricus Ludovicus de Nicolay (Andreas Nicolay);
• annis ab 1803 ad 1810, Nicolaus Novosil'cev;
• annis ab 1818 ad 1855, Sergius Uvarov (Sergius de Ouvaroff);
• annis ab 1855 ad 1864, Demetrius Bludov;
• annis ab 1864 ad 1882, Theodorus Litke (Fridericus Beniaminus de Lütke);
• annis ab 1882 ad 1889, Demetrius Tolstoj;
• annis ab 1889 ad 1915, magnus dux Constantinus Constantini filius.

Die 29 Martii anni 1917 nomen novum, Academia Scientiarum Russica vel Rossica (Russice Российская Академия наук, Francogallice Académie des Sciences de Russie), pro academia olim imperiali a sociis eius propositum est, quod dein et ab administratione temporali Russiae confirmatum est.^[4]