Athenae

Athenae

Res apud Vicidata repertae:

Civitas: Graecia
Locus: 37°59′3″N 23°43′41″E
Numerus incolarum: 643 452
Zona horaria: UTC+2
Situs interretialis
Nomen officiale: Αθήνα

Gestio

Praefectus: Kostas Bakoyannis
Procuratio superior: Athenae demus, Achaea

Geographia

Superficies: 39 chiliometrum quadratum
Territoria finitima: Nea Filadelfeia, Zografou

Coniunctiones urbium

Urbes gemellae: Amstelodamum, Athens, Asgabat, Barcino, Pechinum, Berytus, Bethleem, Bogota, Bucaresta, Casablanca, Sicagum, Damascus, Domodedovo, Arsinoë, Constantinopolis, Labacum, Angelopolis, Kiovia, Matritum, Mexicopolis, Moscua, Neapolis, Nicosia, Rabatum, Rhegium, Urbs Fluminensis, Urbs Sancti Iacobi, Seraium, Seulum, Serdica, Syracusae, Tyrana, Vasingtonia, Erivanum, Bostonia, Claudiopolis, Mons Regius, Genua, Florentia, Bonaeropolis, Olisipo, Calium, Praga, Siganum, Varsovia, Tiphlis, Havana, Cuscum, Amstelodamum, Atlanta, Belgradum

Athenae (-arum, pl., f., Graece Ἀθῆναι, Neograece Αθήνα) et numero incolarum et area sunt maxima Graeciae urbs. Ipse demus, Athenarum media in conglomeratione Atheniensi-Piraea situs, incolas fere 660 000 (anno 2011, sed 796 442 anno 2004!^[1]) numerans parva est, toti autem regioni metropolitanae, quae unitates regionales Athenas Medias, Athenas Septentrionales, Athenas Meridianas, Athenas Occidentales, et quaedam suburbia vicina comprehendit, fere sunt 4 000 000 incolarum.^[2]

Athenae media in regione Attica iacent, iuxta orientalem paeninsulae Graecae oram, a portu Piraeo 8 km distantes. Mons Acropolis abruptus, ubi a millennio tertio a.C.n. homines continenter habitavisse censentur, usque hodie praeclarissimis antiquitatis monumentis ornatus, in media urbe stat. Anno 1987 ab UNESCO mundi hereditas declaratus est, tribus annis post (1990) etiam monasterium Daphnium, quod prope Athenas situm est.

Athenis Museum Archaeologicum Nationale situm est, quod antiquitatum Graecarum maximo in orbe terrarum thesauro locum praebet, necnon Museum Acropoleos nuper aedificatum.

Athenae caput sunt regionis Atticae omnisque civitatis Graecae. Anno 1896, prima Olympia temporis recentioris Athenis facti sunt, secundum anno 2004 Olympiis hospitio fuit.

Athenae nonnumquam cunabula democratiae appellantur, quod Athenienses saeculo sexto a.C.n. exeunte democratiam instituerunt, interdum et "fons culturae Occidentalis," cum artes in Graecia ortae primum ad Romanos, deinde in culturam Europaeam emanabant.

A portu Piraeo naves in permultas regiones et insulas Graeciae crebriter vehuntur. A novo aëroportu Athenarum, ad honorem Eleutherii Benizeli nuncupato, aëroplana ad totam fere orbem terrarum properant. Graecia ferrivias perpaucas, vias stratas hodie plures habet. Ferrivia metropolitana Attica, partim subterranea, hic anno 2000 coepta est, partim ad celebrantes ludos Olympicos 2004 recipiendos aucta est, una cum novis viis stratis, quae urbem penetrant et suburbiis circumferuntur.

Inter urbes divitissimas Athenae hodie sexagesima et septima enumerantur,^[3] inter sumptuosissimas vigesima et quinta.^[4] Regio metropolitana inter densissime habitatas orbis terrarum octogesima et secunda ordinatur.^[5]