Augia insula

Augia insula (Theodisce: Reichenau) est insula habitata Germaniae prope Constantiam urbem in Lacu Bodamico sita. Maxima huius lacus insula est.

Via strata anno 1838 perfecta insulam cum continenti conectit; nihilominus Bruckgraben ("fossa cum ponte") transitum navicularum permittit. Summum insulae est Hochwart, qui dicitur, collis 438.7 m, 43 m super lacu.

Anno 2000 insula cum monasterio Augiensi Divite in indicem UNESCO Mundi Hereditatis posita est. UNESCO Augiam ministerium monasterii mediaevalis in rebus spiritalibus culturalibusque modo exemplari demonstrare iudicavit.

Hodie insula cultu olerum vinique nota est. Insulae propinqua sunt vasta loca uliginosa arundine herbisque palustribus consita nomine Wollmatinger Ried, lege conservata, quod ibi plurimae aves in migrando stationem inveniunt.