Historia Albigensis

Hystoria Albigensis (in orthographia classica Historia Albigensis) est narratio Latine scripta de origine et successu expeditionis sacrae in Albigenses anno 1208 iussu Innocentii III papae inceptae. Petrus Vallium Cernaii monachus, historiae auctor, usque ad finem anni 1218 (Simone comite Montisfortis mense Iunio interfecto) opus produxit (fortasse eo anno ipse mortuus est vel paullo postea).

Opus Innocentio ipso dicatum est; quo die 16 Iulii 1216 mortuo, epistula dedicatoria, qua textus incipit, ante hunc diem scripta erat.

Petrus comitem Montisfortis valde admiravit eumque "comitem nostrum", "athletam Christi", "militem Christi" nuncupat. Cum Cruce signatis omnino consensit verboque simplicissimo "nostri" designat. Catharos autem odit rationesque ob quas ecclesiam Catholicam reiecerunt minime intellexit.