Larva (zoologia)

Larva,^[1][2][3][4] sensu zoologico, est forma animalis de ovo exeuntis ab animali adulto, ad generandam scilicet prolem parato, diversa.^[5] Vertebrata plura sunt larva carentes, scilicet de ovo in forma parentibus simili exeuntia, quam quae larvam habent, ad quae praesertim Amphibia pertinent. E contra, apud Insecta plura sunt larvam habentes quam quae larva carent. Multae larvae nomina propria habent, exempli gratia eruca, larva Lepidopterorum et nonnullorum Hymenopterorum,^[6] vel leptocephalus, larva anguillarum.

Ad quaestionem, quae formae animalium in evolutione primo apparuissent, utrum larvarum an adultorum, primum responsum Ernestus Haeckel dedit, animalia antiquissima larvis hodiernorum similia esse affirmans. E contra, hodie prima animalia adultis hodiernorum potius quam larvis similia fuisse credentur, larvis planctonicis nonnisi Cambrio apparentibus.^[7]