Satyrus peripateticus

Satyrus Callatinus (Graece Σάτυρος), ab Athenaeo Satyrus peripateticus dictus,^[1] biographus Graecus, natus est saeculo IV a.C.n. Callatide in urbe ad oram Ponti Euxini iacente.^[2] An fuit Aristotelis discipulus,^[3] aut scholarchae posterioris, non liquet. Eundem esse ac Satyrum auctorem De demis Alexandrinorum Udalricus de Wilamowitz-Moellendorf olim suasit; Stephanie West ob rationibus variis negavit.^[4]

Satyrus auctor fuit operis De characteribus, e quo unum fragmentum ab Athenaeo citatur. Vitarum seriem ille fortasse primus scripsit, quarum nonnulla fragmenta ab aliis auctoribus citata servantur; notandum est fragmentum ab Athenaeo relatum de regis Philippi II mulieribus et filiis. "Vita Euripidis" e hac serie, per multa saecula omnino deperdita, in libro papyraceo iuxta Oxyrhynchum reperta est, in qua urbe Satyrus ipse habitabat. Haec vita in forma dialogi e fontibus tam anecdotis quam historicis colligitur. Scriptor posterior Heraclides Lembus, Oxyrhynchi incola, epitomen vitarum a Satyro scriptarum confecit.