Turelbaach

Dësen Artikel beschäftegt sech mat der Baach Turelbaach. Fir de Lieu-dit, kuckt wgl. Turelbaach (Lieu-dit).

Turelbaach

D'Turelbaach zu Mäerzeg
An anere Sproochen	de: Turelbach
Längt	9,00 km
Hydrographesche Baseng	Rhäin
Originn
Originn	Quell
Héicht	475 m
Koordinaten	49° 51’ 38.7’’ N       05° 55’ 36.0’’ O
Konfluenz
Leeft an	d'Waark
Plaz	Mäerzeg (in Fullenpesch)
Héicht	311 m
Koordinaten	49° 49’ 57.6’’ N       06° 00’ 23.7’’ O
Geographie
Land	Lëtzebuerg
Uertschaften	Mäerzeg

D'Turelbaach ass eng Baach an de Gemengen Esch-Sauer, Groussbus-Wal a Mäerzeg. Se huet hir Quell um Flouer Hunnebruch (Hierheck), op enger Héicht vu 475 Meter, a leeft dann no kuerzer Zäit a südëstlecher Richtung, an engem Dall tëscht Dellen a Mëtscheed. Op deem Laf mécht si grosso-modo d'Grenz tëscht de Gemenge Groussbus an Esch-Sauer.

Ënnerwee hëlt se an hirem Uewerlaf vu lénks 3 kleng Baachen ouni Numm op, da vu riets d'Welschebaach a vu lénks um Dellerstee eng weider anonym Baach. Um Lieu-dit Turelbaach fiddert s'e Weier, an deem zwou kleng Insele sinn, a wou op enger dovun d'Schlass Turelbaach steet. Vun do un leeft s'um Territoire vun der Gemeng Mäerzeg.

No am Ganzen 9 Kilometer leeft se zu Mäerzeg Am Vullepesch, op enger Héicht vun 311 Meter, op där hirem Kilometerpunkt 19,45 vu lénks an d'Waark.