Dinsdag

Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.

D'n dinsdag is 'nen daag vaan de week. Vaanajds is 't d'n daarden daag vaan de week; in de gaankbare werkweek is 't d'n twieden daag.

De naom dinsdag kump vaan de Germaanse god Tiw/Týr, de god vaan 't twiegevech en gerechtegheid. In 't Latien hèt d'n dinsdag Martis dies, in 't Aajdgrieks ἡμέρα Ἄρεως (hèmera Areôs); de Germane stèlde Mars dus geliek mèt Tiw. Toch is d'n daag neet direk nao de god Mars geneump, meh nao de planeet. 't Symbool veur de planeet Mars (♂, ouch 't symbool veur 't mannelek geslach) woort veural vreuger ouch veur d'n dinsdag gebruuk.

Door zien associatie mèt de planeet Mars weurt d'n dinsdaag vaanajds (in 't volksgeluif en in de astrologie) verboonde mèt mannelekheid en geweld. Daorum kin 't zoewel 'ne gelöksdaag en 'nen oongelöksdaag zien.

'ne Belaankrieke fiesdaag dee op dinsdag vèlt is de Vastelaovend. In de Vereinegde Staote in dinsdag de gewoenen daag veur verkezinge.