Huronmaer

Dit artikel is gesjreve (of begós) in 't Mofers. Laes hie wie v'r mit de versjillende saorte Limburgs ómgaon.

't Huronmaer (Ingels: Lake Huron) is ei vanne vief Groeate Maeren in 't naorde vanne Vereinigdje Staote en 't zuje van Canada, det dore Straot van Mackinac in verbinjing steit mit 't Michiganmaer. 't Ligk tösse Zuudwès-Ontario (in Canada) en oeastelik Michigan. 't Haet de op ei nao grótste oppervlakdje vanne Groeate Maere.

In 't maer ligk 't eilandj Manitoulin; mit 'n oppervlakdje van 2.766 km² is 't 't grótste eilandj in e maer oppe werreld. 't Eilandj sjèdj 't houfvolume van 't Huronmaer in 't zuje vanne smaaldere maerstriep in 't naorde, waat North Channel wuuert geneump, en ouch de groeate golf Georgian Bay in 't naordoeaste.

't Maer wuuert in 't wèste verbónje mit 't Michiganmaer dore Straot van Mackinac, dae zoea 8 km breid is en 37 m deep; de sjeijing tösse dees twieë maere wuuert gevörmp door 't Óngersjiereilandj van Michigan (Lower Peninsula of Michigan). De maere waeren ons samegenómmen es Lake Michigan-Huron. De grótsten instroum van 't Huronmaer is de St. Marys River, 'n reveer van 119,9 km lank waat wuuert gevoord door 't Baovemaer en wovan de volstenjige lingdje de grens vörmp tösse Canada enne Vereinigdje Staote. De grótsten oetstroum is de St. Clair, waat ouch 'n grensreveer is, die oetmundj in 't St. Clairmaer.

't Maer dank ziene naam ane Wendat, 'n indianestam die dore Franse koloniste de Huron geneump woorte.