Natrium

Natrium adolah suatu unsua kimia dalam tabel periodik nan mamiliki lambang Na jo nomor atom 11. Iko adolah logam lunak, putiah keperakan, jo reaktif bana. Natrium adolah logam alkali, barado pado golongan 1 tabel periodik, karano mamiliki satu elektron di kulik diluanyo nan mudah disumbangannyo, manciptakan atom bamuatan positif—kation Na⁺. Satu-satunyo isotop stabil adolah ²³Na. Logam bebasnyo indak tadapek di alam, tapi musti dibuek dari senyawanyo. Natrium adolah unsua kaanam paliang banyak dalam karak bumi, jo tadapek di banyak mineral saparti feldspar, sodalit jo halit (garam batu, NaCl). Banyak garam natrium laruik bana dalam aia: ion natrium alah dilindi dek aksi aia dari mineral Bumi salamo ribuan taun, jo demikian natrium jo klorin adolah unsua nan laruik nan paliang umum tajadi di lautan (badasarkan barek).

Natrium patamo kali diisolasi dek Humphry Davy pado taun 1807 malalui elektrolisis natrium hidroksida. Di antaro banyak sanyawa natrium lain nan baguno, natrium hidroksida (lindi, bahaso Inggirih: lye) digunoan dalam pambuatan sabun, jo natrium klorida (garam dapua) adolah zat pancair es [en] jo nutrisi untuak hewan tamasuak manusia.

Natrium adolah unsua esensial untuak sadoalah hewan jo babarapo tumbuahan. Ion natrium adolah kation utamo pado cairan ekstraselular (extracellular fluid, ECF) dek karano tu marupoan panyumbang utamo pado takanan osmotik ECF jo volume kompartemen ECF. Hilangnyo aia dari kompartemen ECF maningkekan konsentrasi natrium, suatu kondisi nan disabuik hipernatremia. Kahilangan isotonik aia jo natrium dari kompartemen ECF mangurangi ukuran kompartemen tersebut dalam kondisi nan disabuik hipovolemia [en] ECF.

Jo caro pompa natrium-kalium, sel manusia iduik mamompa tigo ion natrium kalua dari sel sabagai ganti duo ion kalium nan dipompa masuak; mambandiangan konsentrasi ion nan malintasi membran sel, dari dalam ka lua, kalium sakitar 40:1, jo natrium, sakitar 1:10. Pado sel saraf, muatan listrik malintasi membran sel sahinggo mamungkinan transmisi impuls saraf—sebuah aksi potensial—katiko muatan itu dihambuakan; natrium mamainan paran nan penting dalam aktivitas itu.^[1]

1. ↑ ""Alkali Metals." Science of Everyday Things". Encyclopedia.com. Diakses tanggal 30 April 2021.