Titanium

Titanium adolah sabuah unsua kimia dalam tabel periodik nan mamiliki simbol Ti jo nomor atom 22. Unsua iko marupoan logam transisi nan ringan, kuek, bakilau, tahan karat (tamasuak tahan terhadap aia lauik, aqua regia, jo klorin) nan bawarna putiah-metalik-keperakan.

Titanium ditamukan di Cornwall, Karajaan Britania Raya pado taun 1791 dek William Gregor nan dinamoi dek Martin Heinrich Klaproth dari mitologi Yunani Titan. Elemen iko ado di antaro deposit-deposit berbagai mineral, diantaronyo rutile jo ilmenit, nan banyak tadapek pado karak bumi jo litosfer, sarato pado hampia sadoalah makhluk iduik, batuan, aia, jo tanah.^[1] Logam iko diekstrak dari bijih mineralnyo malalui proses Kroll atau proses Hunter. Senyawanyo nan paliang umum, titanium dioksida, adolah fotokatalisator umum nan digunoan dalam pambuatan pigmen putiah. Senyawa lainnyo adolah titanium tetraklorida (TiCl₄), komponen layar asok jo katalis; jo titanium triklorida (TiCl₃), digunaoan sabagai katalis dalam produksi polipropilena.

Titanium dapek digunoan sabagai aloi jo basi, aluminium, vanadium, jo molybdenum, untuak mamproduksi aloi nan kuek namun ringan untuak penerbangan (masin jet, misil, adan wahana antariksa), militer, proses industri (kimia jo petrokimia, pabrik desalinasi, pulp, jo karateh), otomotif, agro industri, alat kedokteran, implan ortopedi, pakakeh jo instrumen dokter gigi, implan gigi, pakakeh olahraga, perhiasan, telepon genggam, sarato masih banyak aplikasi lainnyo.^[1]

Duo sifek nan paliang baguno pado titanium adolah katahanan karat jo rasio kakuatan terhadap densitasnyo nan paliang tinggi di antaro sadoalah logam lain.^[2] Pado kondisi murni, titanium samo kuek jo babarapo baja, tatapi labiah ringan.^[3] Ado duo bantuak alotropi jo limo isotop alami dari unsua iko, ⁴⁶Ti sampai ⁵⁰Ti, jo ⁴⁸Ti adolah nan paliang banyak tadapek di alam (73,8%).^[4] Maskipun mamiliki jumlah elektron valensi jo barado pado golongan tabel periodik nan samo jo zirkonium, kaduonyo mamiliki banyak pabedaan pado sifek kimia jo fisika.

1. ↑ ^{a b} "Titanium". Encyclopædia Britannica. 3 Pebruari 2006. http://www.britannica.com/eb/article-9072643/titanium. Diakses pado 29 Desember 2006. 
2. ↑ Donachie, Matthew J., Jr. (1988). TITANIUM: A Technical Guide. Metals Park, OH: ASM International. p. 11. ISBN 0-87170-309-2. 
3. ↑ Barksdale 1968, p. 738
4. ↑ Barbalace, Kenneth L. (2006). "Periodic Table of Elements: Ti – Titanium". Diakses tanggal 30 April 2021.