Gotik

De Gotik is en Twieg vun Architektuur un Kunst in Europa in dat Middelöller. Se is upkamen üm 1140 rüm in de Île-de-France (Gegend um Paris umto). Nöördlich vun de Alpen hett se bit um un bi 1500 duert. Vördem regeer de Kunst- un Bostil vun de Romanik, achterna keem denn de Renaissance. Klar un düütlich af to grenzen is de Gotik vun düsse beiden Stilen bloß in de Architektuur. In de Bildhaueree un Maleree is dat nich so eenfach mööglich.

De Gotik is en Tiedöller ween, wo de Gedanken un Ideen vun den christlichen Gloven to Bild bröcht wurrn is. Dor is veel Symbolik un Allegorie bi bruukt wurrn. Dat beste, wat de Kunst dunntomalen tostanne bröcht hett, weer de gootsche Kathedraal. Se is dat Gesamtkunstwark vun't Middelöller un bringt Architektuur, Bildhaueree un (Glas-) Maleree tohopen. In de Bokunst warrt en Unnerscheed maakt twuschen Fröh- un Hoochgotik un Late Gotik. De sünd in de verscheden Länner in Europa unnerscheedlich gau upkamen.

Vunwegen dat de Spitzbagen as en zentral Element vun de Bokunst in de Gotik ankeken warrt, is de Stil toeerst ok Spitzbagenstil nömmt wurrn.^[1]

1. ↑ Günther Wasmuth (Rutg.): Wasmuths Lexikon der Baukunst; Berlin, 1929-1932, 4 Bännen