Hillige Lanze

De Hillige Lanze (ok: Mauritiuslanze oder Longinuslanze) is dat öllste Stuck vun de Riekskleenodien vun de röömsch-düütschen Könige un Kaisers vun dat Hillge Röömsche Riek. Dor schall en Stuck vun den Hilligen Nagel vun Jesus sien Krüüz mit tohören. De Legenn vertellt, dor hannelt sik dat um de Lanze vun Mauritius bi, de Baas vun de Thebaische Legion ween is. Annere Borns seggt, se weer den Hauptmann Longinus siene Lanzen ween. He harr dor mit pröövt, of Jesus an’n Krüüz al dood weer un harr em dormit in’e Siet staken. Vundeswegen schall dor ok sien Hillig Bloot an backen.

Tiedwiese is se dat wichtigste Stück vun den Rieksschatt ween, man later is de Riekskroon an düsse Stäe treden. De Spitz vun de Lanze is in en holle Kamer in den Dwarsbalken vun dat Riekskrüüz up bewohrt wurrn. De Lüde düch dat dormols, dat en Herrscher, de düsse Lanzen bi sik harrt hett, nich unner to kriegen weer. Se weer dor dat sichtbor Teken for, dat he siene Macht vun Gott kregen harr un dat he an Christus siene Stäe stunn.

Dat gifft tominnst noch dree annere Lanzen oder Lanzenspitzen, vun de seggt warrt, se weern de „echten“ Hillgen Lanzen ut Jesus siene Tied. (kiek bi #Annere Hillige Lanzen). Al to Kaiser Otto III. siene Tied sünd twee Kopien vun de originale Lanze maakt wurrn. De hefft den Frunnen vun den Kaiser, de in dat Utland regeern döen, kregen.

Mit de annern Riekskleenodien is se in de Tied vun Napoleon siene Feldtöge vun Nürnbarg na Wien brocht wurrn. Napoleon scholl se nich in’e Hand kriegen.

Just vor den Tweeten Weltkrieg hett Adolf Hitler de Lanze wedder na Nürnbarg bringen laten. 1945 is se vun allieerte Suldaten in en Stollen funnen wurrn un denn torüch brocht wurrn na Wien. Hüdigendags is se in de Schattkamer vun de Hoffborg in Wien utstellt unner de Inventarnummer XIII, 19.