Speelbaas

De Speelbaas is de Person, de in de Filmkunst oder bi’t Theater dat Seggen hett, woans de Szenen, de in dat Dreihbook oder in dat Theaterstück staht, ümtosetten un vun de Schauspelers to spelen sünd. Man seggt ok, he hett de Regie (dt.: Regisseur vun frz.: régisseur; régir: leiden; he föhrt sotoseggen dat „Regiment“). Manchmol gifft dat ok mehrere Lüüd, de wat to seggen hebbt, aver an’n End mutt jümmer eener Bescheed geven, wo’t langs geiht. De anneren Lüüd sünd denn de Assistenten.

Man ünnerscheed twüschen Bühnenspeelbaas, den dat in alle Oorden vun Bühnen-Warken geven deit, as Schauspeel, Musical, Oper, Operette usw., den Filmspeelbaas, de Bewegte Biller in Filmen inszeneeren deit, den Fernsehspeelbaas, de dat nich mit Filmen, man mit annere Senden, Shows usw. to kriegen hett, un den Höörspeelspeelbaas, de Höörspeel-Geschichten vör den Rundfunk oder för Höörböker leiden deit. Gemeen hebbt se all, dat se in de Verantwoorden sünd för de künstlerisch Gestalten vun jemehr Projekt, de normalerwies op en schriftlich Vörlaag baseert.