Bolanpasset

Bolanpasset er eit fjellpass i austre Balutsjistan vest i Pakistan, 120 km frå grensa til Afghanistan. Passet går gjennom Toba Kakar-fjella, ei sidekjede til Himalaya. Passet er rundt 89 km langt, og er danna av fleire tronge juv. På det vidaste er passet 26 km breitt, denne delen ligg sør for Mach på Lalejisletta.^[1] Bolanelva renn gjennom delar av passet.

Bolanpasset går frå Dadar på Karachi-slettene, omkring 100 meter over havet, til høgslettene rundt Quetta, omkring 1700 meter over havet.^[2] Det bind saman Jacobabad og Sibi med Quetta med både veg og jernbane.^[1]

Passet ligg strategisk til, og har blitt brukt av både nomadar, handelsfolk og erobrarar mellom Sentral- og Sør-Asia.^[3] Det var viktig i dei britiske felttoga i Afghanistan. I 1883 forhandla Robert Groves Sandeman fram ein avtale med khanen av Kalat, Khudadad Khan, der britane fekk kontroll over passet mot å betala ei årleg avgift.^[4]

Den lokale folkesetnaden er hovudsakleg stammar av brahuifolk.^[5][6]

1. ↑ ^{1,0 1,1} Bolan Pass, Encyclopedia Britannica 7-20-1998, henta 26. mars 2017.
2. ↑ Carlquist, Gunnar: Svensk uppslagsbok. Bd 4, Svensk Uppslagsbok AB, Malmö 1938 (nyutgåva av 1930 års utgåva), s. 458. 
3. ↑ Singh, Sarina (2004). Pakistan & the Karakoram Highway (6th utg.). Lonely Planet. s. 112. ISBN 978-0-86442-709-0. 
4. ↑ Singh, Sarina (2004). Pakistan & the Karakoram Highway (6th utg.). Lonely Planet. s. 113. ISBN 978-0-86442-709-0. 
5. ↑ Minahan, James B. (31. august 2016), «Brahui», Encyclopedia of Stateless Nations: Ethnic and National Groups around the World, 2. utg: Ethnic and National Groups around the World, ABC-CLIO, s. 79–80, ISBN 978-1-61069-954-9 
6. ↑ Shah, Mahmood Ali (1992), Sardari, jirga & local government systems in Balochistan, Qasim Printers, s. 6–7