The Move

The Move
The Move, frå venstre Carl Wayne, Roy Wood, Ace Kefford, Bev Bevan og Trevor Burton
Opphav	Birmingham i England
Periode	1965–1972
Aktiv	1965–2016
Sjanger	Rock og psykedelisk rock
Plateselskap	Deram Records, Fly Records, IL
Medlemmer	Roy Wood Carl Wayne Bev Bevan Chris «Ace» Kefford Trevor Burton Jeff Lynne Rick Price

The Move var eit av dei fremste engelske banda på 1960-talet. Bandet oppstod i Birmingham i 1965 ved at frontfigurane frå banda Carl Wayne and the Vikings, The Nightriders og The Mayfair Set gjekk saman om å danna eit nytt band. Namnet til bandet, The Move, speglar nettopp dette at medlemmane hadde flytta over frå andre band. Leiaren var gitaristen, songaren og låtskrivaren Roy Wood, som komponerte dei fleste av hitsinglane til gruppa. I dei fem åra dei konsentrerte seg om popmusikk, hadde dei ni topp 20-plasseringar. Seinare dreiv dei The Move som vekselsbruk med Electric Light Orchestra og konsentrerte seg stadig meir om symfonisk rock. Det var først heilt på slutten av karrieren at gruppa satsa på turneverksemd i USA. Likevel blir ho rekna for å ha vore innfverknadsrik og å ha påverka rockemusikken òg på den andre sida av Atlanteren.

The Move var særleg påverka av The Beatles, Motown og amerikanske «West Coast»-band. Roy Wood, trommeslagaren Bev Bevan, bassisten Chris «Ace» Kefford, songaren Carl Wayne og gitaristen Trevor Burton fekk raskt ry for å vera blant dei dugelegaste og mest underhaldande liveartistane i England. Seinare kom dei til å leggja meir vekt på studioarbeid, og det var trioen Wood, Bevan og gitarist/keyboardist Jeff Lynne som omforma The Move til Electric Light Orchestra.