Malaikat

Malaikat (bahsa Arab: ملاءكة‎) nyan salah saboh bagoë peuneujeuët Allah ta'ala. Malaikat neupeujeuët lé Allah Ta'ala nibak nur, yakni cahya. Sabab nyankeuh geupeunan malaikat ngön Ajsaam Nuuraaniyah (bahsa Arab: أجسام نورانية‎). Malaikat jeuët geupeurupa droëgeuh mumacam rupa ngön beuntuk. Ék geupubuët peukara nyang han ék jipubuët lé manusia. Mandum malaikat nyan hana tom geubantah peurintah Allah ta'ala, hana pajôh makanan, hana jép ië. Hana meukawén, kön agam kön inöng.

Meukeusud meuiman keu malaikat Allah beu yakin ngon patéh nyang bahwa malaikat nyan na. Cukôp na le malaikat nyang neupeujeuët lé Allah, na nyang di langèt, na nyang di bumoë, na nyang tugaih malam na nyang tugaih uroë.