Art (Biologie)

D Art, au Spezies oder Species^[1], isch d Grundäihäit vo dr biologische Süstematik.

Die latynische Abchürzig isch spec., was vo latiin. species ‚Art‘ chunt.

Bis jetz het mä s noonig fertig brocht, dr Begriff Art allgemäin z definiere, so dass er die theoretische und braktische Aafordrige vo alle biologische Däildiszipline im gliiche Maass erfüllt. Es git in dr Biologii verschiideni Konzept vo dr Art, und die füere zu underschidlige Klassifikazioone. Historisch wie au aktuell spiile zwäi Aasätz vo Artkonzept e wichdigi Rolle: s äinte, dr biologisch Artbegriff, basiert uf dr Grundlaag von ere bostulierte Furtpflanzigsgmäinschaft, s andere, dr morfologisch Artbegriff, uf dr Aanaam von ere Grubbe vo Indiwidue mit charakteristische gmäinsame Artmerkmol, wo mä mit ene klar will abgränze, wär zuen ere Art ghöört und wär nid.

S Brobleem bim Definiere von ere Art bestoot us zwäi Däil:

1. Grubbebildig: Weli Indiwidue ghööre zämme?
2. Rangbildig: Welere vo allne de Grubbe, wo inenander gschachtlet si uf Grund vo abgstuefte Äänligkäite und Beziejige, wämmer as „Art“ bezäichne?^[2]

D Hauptunderschiid zwüsche de verschiidene Artkonzept lige uf dr Eebeni vo dr Rangbildig.

Ere Grubbe vo Lääbewääse unabhängig vo iirem Rang säge d Taxonome e Sippe oder e Taxon.

1. ↑ Art. Lexikon der Biologie, Onläin-Usgoob, abgrüeft am 11. Dezämber 2014.
2. ↑ Christopher D. Horvath: Discussion: Phylogenetic Species Concept: Pluralism, Monism, and History. In: Biology and Philosophy. Band 12, Nr. 2, 1997, S. 225–232, doi:10.1023/A:1006597910504