Christoph Kolumbus

Dr Christoph Kolumbus (ital. Cristoforo Colombo, schban. Cristóbal Colón, port. Cristóvão Colombo, ängl. Christopher Columbus, latinisiert Columbus, iidütscht Kolumbus; * um 1451 z Genua; † 20. Mai 1506 z Valladolid) isch en italiänische Seefaarer in schbanische Dienst gsi, wo im Joor 1492 Amerika widerentdeckt het.

Wie mä hüte wäiss, isch dr amerikanischi Kontinänt scho öbbe 500 Joor vor em Kolumbus vom Leif Eriksson oder andere Isländer entdeckt worde. Ass dr Kolumbus bis hüte äinewääg as dr öiropäisch Entdecker vo Amerika aagluegt wird, chunnt drvo, ass es erst wäge sine Räise Lüt us andere Kontinänt in gschichtliger Zit Amerika duurhaft häi afo kolonisiere.

Dr Kolumbus het e westlige Seewääg vo Öiropa uf Ostasie welle finde und isch am 12. Oktober 1492 uf äinere vo de Karibische Insle, wo im amerikanische Kontinänt vorglaageret si, glandet. Är sälber het bis zu sim Dood glaubt, ass er e Wääg uf „Hinderindie“ entdeckt het. Er het aber nie glaubt, wie mä hüfig säit, ass er z Indie sälber aachoo sig.

Wie mä sini Daate und Läistige sött bewärte, do drüber wird hützudags vil diskutiert. Uf dr äinte Site isch si Entdeckerdrang und si Muet, in unbekannti Gwässer vorzstoosse, uf dr andere ass d Schbanier druf die indianischi Bevölkerig versklavt und Gröieldaate verbroche häi. Öb dr Kolumbus sälber au diräkt für sonigi Sache verantwortlig gsi isch, isch nid sicher. Au git s Zwiifel draa, öb er nume vo sim Entdeckerdrang motiwiert gsi isch. Noch sine Logbüecher und Brief isch s vor allem d Suechi noch Edelmetall gsi, won en driibe het.^[1]

1. ↑ Samuel Eliot Morison: Journals and Other Documents on the Life and Voyages of Christopher Columbus. Heritage Publishers, New York 1963.