Droge

As Droge oder Ruschgift wärde stark wirksami psüchotropi Substanze bezäichnet und Brodukt, wo mä us ene macht. Mäistens häi Droge e Wirkig, wo s Bewusstsi und d Woornäämig veränderet. Droge, wo dradizionell as Gnussmiddel verwändet oder as Medikamänt iigstueft wärde, wärde vo de Lüt mäistens nid as Droge aagluegt, au wemm mä von ene e Rusch cha überchoo oder dr Zuestand vom Bewusstsii sich cha ändere, wemm mä gnueg drvo nimmt.

Dr Begriff wird hüte im Dütsche andersch verwändet as im Änglische, wo mä mit drugs allgemäin Medikamänt mäint, und psüchoaktive Substanze, wo nid für medizinischi Zwäck iignoo wärde, recreational drugs säit. Früener het dr Begriff Droge au im Dütsche e nöitrali Bedütig gha und het Arzneidroge gmäint.

Es git kä Konsens bi dr Froog, wie hooch dr Drogekonsum chönnt si, ass men en gsellschaftlig und volkswirtschaftlig chönnt toleriere. D Debatte isch mäistens ideologisch gfärbt und wird irrazional gfüert. Es git nazionali Gsetz und internazionali Abkomme wo dr Gebruuch vo psüchotrope Substanze witgehend reglementiere und dr Handel mit ene und dr Umlauf iischränke, wil aber d Noochfroog äinewääg hooch isch, isch vor allem für die sträng reglementierte Droge e wältwiiti Schattewirtschaft in de Händ vo kriminelle Organisazioone entstande, wo in vile Länder mit schwache staatlige Instituzione d Macht vo dr Regierig cha gfäärde. Noch mee as eme halbe Joorhundert von ere strikte Abläänig vo psüchotroope Substanze, wo uf dr ganze Linie gschiteret isch, het sich in de letschte Joorzäänt in gwüsse Länder e vernümftigeri Drogepolitik afo usbräite, wo wenigstens schwecheri Droge wie Cannabis frei git und für sterkeri Alternative aabietet.

Zu de Droge, wo in gwüsse Däil vo dr Wält dradizionell as Gnussmiddel verwändet wärde, ghööre under anderem Koffein (Kaffee, Tee), Alkohol (Bier, Wein, Schnaps), Nikotin (Dubak), Cannabis (Marihuana, Haschisch), Betel und Kath.