Goldene Horde

Die Goldigi Horde (mongolisch Алтан Орд/Altan Ord; tatarisch Алтын Урда/Altın Urda;^[1] russisch Золотая Орда/Solotaja Orda) isch dr Naame vom ene middelalterlige mongolische Khanat, wo vo Ostöiropa bis uf Westsibirie gange isch. S Riich vo dr Goldige Horde het zu de Groossmächt im östlige Öiropa im spoote Middelalter ghöört. Noch em Mongoolesturm vo 1237 bis 1240 bis zur erste Helfti vom 14. Joorhundert isch s dört die dominierendi Macht gsi.

Bis öbbe 1342 häi d Khan in dr Stadt Alt-Sarai im Wolgadelta residiert. Denn isch Nöi-Sarai (au Berke-Sarai), wo witer nördlig an dr Wolga lit, dr Sitz vo de mongolische Herrscher worde. Allerdings häi d Khan nume im Winter in dene Stedt gwoont, wil si im Summer mit iire Rosshärde in de witen Steppegebiet vo dr Ukraine, vo Russland und vo Kasachstan ufghalte häi, so wie s iire alte, nomadische Dradizioone entsproche het. In dere Zit si si vo bevollmächtigte Statthalter verdräte worde.

S Riich vo dr Horde isch straff organisiert gsi, bis 1360 d Linie vo de Gründerkhan Batu und Berke erlosche si. Es het denn innere Usenandersetzige um s Erb gee, und s Riich isch in meereri Däilriich zerfalle.

1480 het die Goldigi Horde under em Akhmat Khan (reg. 1465–1481) d Oberherrschaft über Russland verloore und dä isch vom Ibaq Khan, em Herrscher vom Khanat Sibir, umbrocht worde. Im Joor 1502 isch dr letschti Khan vo dr Goldige Horde, dr Shaykh Ahmad (reg. 1481–1502) vom Meñli I. Giray (reg. 1467–1514), em Khan vo de Krimtatare, besigt worde. Er isch uf Litaue gflüchdet und dört churz druf hiigrichdet worde.

1. ↑ Referänz-Fähler: Uugiltige <ref>-Tag; s isch kei Täxt fir s Ref mit em Name Orda aagee wore.