Klima

S Klima stoot as Begriff für alli meteorologische Vorgäng, wo für e durchschnittlig Zuestand vo dr Ärdatmosfääre an äim Ort verantwortlig si. Oder andersch usdruggt: s Klima schliesst alli Wätterzueständ ii, wo am ene Ort mööglig si, iischliesslig iiri tüpische Abfolg und iiri daages- und jooreszitlige Schwankige. S Klima wird drbii aber nit nume vo Brozäss innerhalb vo dr Atmosfääre brägt, sondern dur s Wäggselspiil vo alle Sfääre vo dr Ärde (Kontinänt, Meer, Atmosfääre) und de Sunneaktividääte (Iiszite) u. a. Iiflüss wie z. B. d Ärdbaaninstabilidäät. Es umfasst au die verschiidenste Gröössenornige, wo vor allem die zitligi und die rüümligi Dimension vom Klimabegriff vo entschäidender Bedütig für däm si Verständnis si.

D Wüsseschaft, wo d Gsetzmäässikäite vom Klima erforscht, däm sine Äigeschafte, Entwigglig und Erschiinigsbild, bezäichnet mä as Klimatologii.