Madlee

Madlee isch e alemannischi Abkirzig vum Maidlinamme Magdalena. So heißt aü e Gedichtband vum Hermann Burte, wu 1923 rüskumme isch. Dr vollständig Titel: Madlee – Alemannische Gedichte.

Mit däne Gedichter het dr Burte noch em Johann Peter Hebel e wittere Hegschtpunkt fir d alemannisch Dialäktdichtig gsetzt. Dr het, so schribt dr Richard Gäng, „eine nie geübte Vertiefung, Ballung und Verdichtung der Sprache“ erreicht. Aü si Themewahl isch revolutionär. Bim Hebel hets in dr Dialäktdichtig no kenni Rätsel ohni Lesig gä, schribt dr Gäng, alles seig in dr Ornig vum Gsetz un vu Gott gstande, s Guet heb iber s Bes alliwiil d Oberhand gwunne. Dr Burte aber diäg soziali Froge biäte, d Schrei vu dr Quälte un Rächtlose dransportiäre un diäg aü derte no s Bild vum Mänsch ufstelle, wu d Obrigkeit un d Spiißer numme Verirrig oder Schuld sähne.