Marcus Antonius

Dä Artikel behandlet dr römisch Politiker, Fäldheer und Triumvir (86/83–30 v. d. Z.). Anderi Persone mit däm Naame findsch do.

Dr Marcus Antonius (iidütscht Mark Anton, churz Antonius; * 14. Januar 82, 83 oder 86 v. d. Z.; † 1. August 30 v. d. Z.) isch e römische Politiker und Fäldheer gsi. Zerst isch er en Aahänger vom Gaius Iulius Caesar gsi und het eso Karriere gmacht. Wo dr Caesar im Joor 44 v. d. Z. ermordet worde isch, isch er äine vo de mächdigste Manne z Rom gsi. Er het mit em Octavian, wo spööter as Kaiser Augustus ghäisse het, und em Marcus Aemilius Lepidus s zwäite Triumvirat abgschlosse. 42 v. d. Z. het er d Partei vo de Mörder vom Caesar entmachdet und het sithär dr Oste vom Römische Riich verwaltet und isch dr Gliebti vo dr egüptische Köönigin Kleopatra worde. Dr Geegesatz zum Octavian isch aber immer grösser worde und het schliesslig im Joor 32 v. d. Z. zum offene Chrieg gfüert. 31 v. d. Z. isch s zur entschäidende Schlacht bi Actium cho wo dr Marcus Antonius verloore het. Im Joor druf häi är und d Kleopatra Sälbstmord begange. Dr Wääg vom Octavian zur Elläiheerschaft über Rom isch frei gsi.