Mensch

Mensch
Carl von Linné, nachträglich designierte Typus vo dr Art Homo sapiens und gliichzitig ire Erstbeschriiber
Systematik
Altwältaffe (Catarrhini) Überfamilie: Menschenartigi (Hominoidea) Familie: Menschenaffe (Hominidae) Tribus: Hominini Gattig: Homo Art: Mensch
Wüsseschaftlige Name
Homo sapiens
Linnaeus, 1758

Dr Mensch (au Homo sapiens, lat., verständige bzw. wiise, gscheite, schlaue, vernünftige Mensch) isch noch dr biologische Systematik e hööchere Süüger us dr Ornig vo de Primate (Primates). Er ghöört zur Underornig vo de Drochenaaseaffe (Haplorrhini) und dört zur Familie vo de Menschenaffe (Hominidae).

Dr Mensch isch die äinzigi rezänti Art vo dr Gattig Homo. Er isch in Afrika sit öbbe 200'000 Joor fossil beläit^[1] und het sich dört über e Mosaikform, wo as archaische Homo sapiens bezeichnet wird, vermuetlig us Homo erectus entwigglet. Witeri fossili Beleeg, wo aber dütlig jünger si, git s für d Art us alle Kontinänt usser Antarktika. Vo de Arte, wo no lääbe, si d Schimpanse em Menschen stammesgschichtlig am nöggste verwandt; in Bezug uf d Geen isch dr Mensch aber de Gorilla am äänligste: d Gorilla underschäide sich genetisch weniger vom Mensch als vo Schimpanse.^[2]

D Wältbevölkerig vom Mensch het hüt e Gröössi vo mee as siibe Milliarde Indiwidue.^[3]

1. ↑ Ian McDougall et al.: Stratigraphic placement and age of modern humans from Kibish, Ethiopia. In: Nature. Band 433, 2005, S. 733–736, doi:10.1038/nature03258
2. ↑ Aylwyn Scally et al.: Insights into hominid evolution from the gorilla genome sequence. In: Nature. Band 483, 2012, S. 169–175, (hier: S. 170), doi:10.1038/nature10842
3. ↑ U.S. Census Bureau: World POPClock. Archiviert vom Original am 29. Juni 2015; abgruefen am 12. Juni 2015.