Murad III.

Murad III.
Periode	Ufstiig vom Ottomanische Riich
Volle Naame	Murad III.
Uf ottomanischem Türkisch	مراد ثالث
Uf d Wält cho	4. Juli 1546
Geburtsort	Bozdağan oder Manisa
Gstorbe	15/16. Januar 1595
Stärbensort	Topkapı Balast z Istambul
Vorgänger	Selim II.
Noochfolger	Mehmed III.
Consort	Safiye (ursprünglig Sofia Baffo)

Dr Murad III. (* 4. Juli 1546; † 15./16. Januar 1595) isch vo 1574 bis 1595 Sultan vom Osmanische Riich gsi.

Dr Murad isch dr eltist Soon vom Selim II. gsi und isch noch em Dood vo sim Vater am 12. Dezämber 1574 uf e Droon choo. Gregiert het aber immer no dr mächdig Groosswesir Sokollu Mehmed Pascha bis dass er im Oktober 1579 ermordet worden isch. Si Autoritäät isch immer mee dur en Iifluss vom Harem underwanderet worde, wo wääred im Murad sinere Heerschaft e Höepunggt ghaa het. Die wichdigsti Rolle het doo drbii d Safiye gschbiilt, wo d Lieblingsfrau vom Sultan gsi isch. D Safiye isch en aadligi Venezianere gsi, wo dr Vater von ere Statthalter vo Korfu gsi isch, und wo as Chind vo türkische Korsare gfange gnoo und an dr Harem verchauft worde isch.

Dr Murad het sofort, won er Sultan worden isch, sini Brüeder lo umbringe. Im Allgemäine sig er aber guetmüetig gsi. Er isch scho früe Opium afo rauche und het sich nie für Politik intressiert. Er het mystischi Gedicht gschriibe und sich mit Dichder, Musiker und Komiker umgää.

Er het brobiert, s Bruuche vo Ruschmiddel under de Janitschaare iizdämme, het aber käi Erfolg ghaa und dr Staat het d Janitschaare immer weeniger chönne kontrolliere. D Korrupzioon im Staat vor allem in dr Armee, isch verheerend gsi. Dr Sultan persöönlig het Ämter verchauft und Leeche konfisziert und an Günstling vergee.

1578 het e lange und düüre Fäldzuug gege Persie aagfange. Dä isch zum Däil dur Gäldentwärtig finanziert worden, was zu Revolte vo de Janitschaare gfüert het.

1593 isch in Öiropa dr sogenannti Langi Türkechrieg usbroche, wo au noch em Dood vom Murad 1595 no witergange isch.

Under em Murad III. häi d Bezieige zwüschen Ängland und dr Pforte aagfange. 1580 si die erste Kapitulazioone mit Ängland underschriibe worde; 1583 isch dr William Harebone dr erst änglisch Bootschafter bi dr Hooche Pforte z Istambul worde. 1593 häi gschäftligi Kapitulazioonen de Änglander die gliiche Rächt gee, wo d Franzoose scho gha häi.