Ramadan

Dr Ramadan (arabisch رمضان ‎, DMG ramaḍān ‚dr häissi Monet‘) isch dr Fastemonet vo de Muslim und dr nünt Monat im islamische Mondkaländer. Noch dr islamische Uffassig isch in däm Monet dr Koran aabegschiggt worde. Dr Monet vorhäe im islamische Kaländer isch dr Scha'ban, dä nochhäär dr Schawwal.

S Fest vom Fastebräche (arabisch: id al-fitr / türkisch: Ramazan bayramı) am Ändi vom Ramadan isch noch em Opferfest dr höggst islamisch Fiirdig.

Dr Ramadan foot aa, wenn Züüge die nöi Mondsichle (hilal) am Ändi vom letschte Daag vom Monet Scha’ban chönne gsee und er goot z Änd, wenn Züüge d Mondsichle am letschte Daag vom Monet Ramadan entdegge. Wääred em ganze Monet darf am Daag wenn s hell isch, weder gässe no drunke wärde. Au Rauche und Sex si verbote und überhaupt alles, wo mä as Sünd cha aaluege. Mit em Iibruch vo dr Nacht wird s Faste broche (fitr /iftar) und denn daf mä bis zur Morgedämmerig ässe und drinke. S letschte Mööli vo dr Nacht, s sogenannte sahūr (سحور / saḥūr ) findet im letschte Driddel vo dr Nacht statt. Vo däm muess mä denn dr ganz Daag lääbe. Das cha vor allem in de Joor seer schweer si, wo dr Ramadan im Summer chunnt. In vile islamische Länder goot in däm Moonet die wirtschaftligi Däätikäit zrugg und s Lääbe findet vor allem z Nacht bim Fiire statt.