Roma

D Roma (Plural männlig; Singular männlig: Rom, Singular wiiblig: Romni, Plural wiiblig: Romnja) isch en Ooberbegriff für e Räije vo Bevölkerigsgrubbe, wo die gliichi Sprooch, s indoarische Romanes schwätze, und, wie mä vermuetet, au die gliich historisch-geografischi Häärkumft us em Indische Subkontinänt häi. Fast alli Roma si sit mindestens 700 Joor in Öiropa dehäi. Si bilde in alle ire Häimetländer e Minderhäit. Si lääbe mäistens nid in gschlossene Gmäinschafte, sondern däile sich in e Hufe underschidligi Grubbe mit vilfältige Bsunderhäite ii, wo vo dr Sprooch, Kultur und Gschicht vo dr jewiilige Dominanzgsellschaft brägt si.

D Roma bilde die grössti ethnischi Minderhäit in Öiropa.^[1] E Hufe von ene wärde wäge iirer Ethnii und iirer soziale Situazioon marginalisiert und stöön eso im Schnittfäld vo zwäi Forme vo dr gsellschaftlige Usgränzig, wo sich gegesitig versterke. In mängge öiropäischen Staate wärde si über e gsellschaftligi Randstellig uuse immer no offe verfolgt.

Roma wird im Dütsche öbbe im Wortbäärli Sinti und Roma abgränzend vo dr Däilgrubbe vo de Sinti au as Bezäichnig für ostöiropäischi Roma benutzt. D Bezäichnig „Zigüüner“, wo im dütschsproochige Ruum verbräitet isch, gältet hüte as diskriminierend.^[2]

1. ↑ Roma integration in the EU abgrüeft am 4. April 2020
2. ↑ Alexandra Opera, Margareta Matache: Reclaiming a Narrative: A Critical Assessment of Terminology in the Fight for Roma Rights. In: European Network Against Racism and Central Council of German Sinti and Roma (Hrsg.): Dimensions of Antigypsyism in Europe. Brüssel 2019, ISBN 978-2-9601308-2-9, S. 276–300 (enar-eu.org [PDF]).